சுதந்திரம்

நாம் பிறந்த பூமி நமக்கில்லை
இனிப் பிறப்போர் வாழ வழியில்லை
உதிரம் கொடுத்துக் காத்தனர் மறவர்
உதிரம் காக்க விற்றனர் சிறியர்
விலைமகள் கொடுத்தாள் தன் மேனி பிறர்க்கு
விலைமகன் கொடுத்தான் தன் பூமி பிறர்க்கு
புகையில்லை மதுவில்லை வீரமறவர் ஆண்ட போது
இரண்டும் வந்தது விலைமகளுடன் கொடியவர் ஆளும்போது
காலம் மாறும் காட்சிகள் மாறும்
வீழ்ந்தவர் எழுவர் புதுமுகம் காட்டுவர்
கயவர் ஓடுவர் புறந்தனைக் கட்டுவர்
விண்ணும் மண்ணும் வியக்கும் அன்று
நம் தமிழன் கொண்ட நெஞ்சுறுதி கண்டு
கனவுச் சுதந்திரம் கைகளில் கண்டு
களிக்கும் நாள் வரும் கலங்காதே இன்று.